Сайт кхьираг, журналист, сценарист-режиссер, композитор Седакъет Керимовадин туькlуьрунриз талукьарнава.
Loading
Сайт кхьираг, журналист, сценарист-режиссер, композитор Седакъет Керимовадин туькlуьрунриз талукьарнава.
Азербайжандин тlвар-ван авай манийринни кьуьлерин халкьдин коллектив тир «Сувар» 1996-йисуз тlвар-ван авай кхьираг ва журналист Седакъет Керимовади арадиз гъана. Иервилин, михьивилин ва паквилин лишан тир «сувар» гаф цуькведа авай дагъларин ценерин, гьакlни халкьдин суваррин тlварарикай къачунва.
Ансамблдин сад лагьай концерт 1997-йисуз Бакуда, Жегьил Тамашачийрин Театрда гурлудаказ кьиле фена ва халкьдин гегьенш къатарин чlехи гьуьрмет къазанмишна.
Ансамблдик Тофик Мамедов, Гьуьсейн Муслимов, Габил Ибрагьимов, Мамед Агъасиев, Рубаба Байрамбекова, Руслан Пирвердиев хьин музыкантри чпин пай кутуна. Азербайжандин Гьукуматдин Консерватория акьалтlарнавай Заур Мусаева кларнетдал, зуьрнедал ва кфилдал тамамарай халкьдин къадим макьамри ансамблдин сейливал артухарна.
Решад Ибрагьимов, Жавагьир Абдулова, Джамиля Залова, Роза Гьажимурадова, Эльвина Гьейдарова хьтин солистрин манийрикай туькlуьрнавай репертуар тамашачийри хъсандиз кьабулна.
Ансамблдин репертуар сад лагьай йикъалай кьве хиляй вилик фена: лезги халкьдин дегь гьаваяр ва Седакъет Керимовадин туькlуьрай манияр.
2004-йисуз С.Керимовади ансамблда «Лезгинка кьуьлерин мектеб» туькlуьрна. Адан сад лагьай хореограф Санан Гьуьсейнли хьана. Гуьгъуьнлай Азербайжандин Гьукуматдин Кьуьлерин Ансамблдин солист Зейнал Джигерханов мектебдик экечlна. Са кьадар вахтунилай адахъ галаз санал хореограф Гюльнара Байрамовани ансамбльдив эгечlна.
2006-йисуз Азербайджандин Гьукуматдин Операдинни Балетдин Театрда ансамблдин 10 йисан юбилейдин концерт кьиле фена. Программадик «Жегьилваль», «Булахдал», «Гуьруьш» (къурулуш З.Жигерханован), гьакlни «Къарияр», «Чепелукьар», «Дем», «Къугъар» (къурулуш С. Керимовадин) хьтин кьуьлер квай. Абурун арада «Къарияр» кьуьлуьни иллаки популярвал къазанмишна ва къенин йикъалди адан визитдин картуниз элкъвенва.
«Сувар» ансамблди Бакудин кьилин медениятдин дараматар тир Рашид Бейбутован тlварунихъ квай Манидин театрда, Азербайджандин Гьукуматдин Филармонияда, Самед Вургъунан тlварунихъ квай Урусрин Драмтетрда, Азербайджандин Гьукуматдин Операдинни Балетдин Театрда кьиле фена.
2009-йисуз Туьркиядин TRT телеканалди коллективдиз мугьманвиле эверна. Адаз лезгийрин харусенят дуьньядиз къалурдай мумкинвал гана. С.Керимовадиз ва ада регьбервал гузвай «Сувар» ансамблдин яратмишунриз талукьарнавай кьилдин гунуг дуьньядин 37 уьлкведиз трансляция авуна. 2011-йисуз Азербайджандин медениятдин ва спортдин министерстводи ансамбль «Халкьдин коллектив» гьуьрметдин тlварцlиз лайихлу авуна. Гьа йисуз ансамблди Анкарада кьиле фейи международный фестивалда чи республикадин тlварцlяй иштиракна. Ана са югъ кьилди ансамбльдин программадиз талукьарна.
Москвадин чара-чара концертрин залрани ансамблдин концертар хъсандиз кьиле фена.
2016-йисуз Бакудин Гьейдар Алиеван дараматда ансамблдин 20 йисан юбилейдиз талукьарнавай юбилейдин концерт кьиле фена. Мярекатдин вахтунда Седакъет Керимовади ансамблдин тарихдиз талукьарна кхьенвай «Сувар» ктабдин презентацияни кьиле фена. Ансамбль арадиз гъана 20 йисан къене датlана адаз регьбервал гайи Седакъет Керимовади мярекатдин эхирда вичин эменни ансамбльдин кьуьлдайди тир Завир Наджафован ихтиярда вугана, гьакlни коллективдин идеядин регьбервилин статус вичин хиве туна.
20 йисан къене ансамбльдин алакьунрикай кьетlенди Азербайджандин лезгийрин харусенят чи республикада ва адан сергьятрилай яргъара теблигъ авун хьана. Икьван гагьди ансамблди 40 халкьдин гьава цlийи кьилелай туьхкlуьрна ва 10 цlийи кьуьл арадиз гъана.
«2016-йисалай инихъ ансамблдиз Завир Наджафова регьбервал гузва.