Поэзия

Лагьана

Накь дустари зи гъарибвал кьатIана,

Март акъатда, дерт алатда, лагьана.

ТIебиатди шадарда вун датIана,

Мад кIвачерихъ эвер акатда, лагьана.

Дегиш жеда, къумбар жеда ви гьалар,

КIурукIар хьиз ахъа жеда ви чIалар,

Гьармад сана пелеш хьанвай кьегьалар,

Сад садавди мад агатда, лагьана.

Гатфарин жив цIраз дагъдин хивера,

КукупI хьтин рушар хьурай ценера,

Рагь акьурла таза, къацу шивера,

КIанчIарайни звал акъатда, лагьана.

Аватда ви къуьнеравай хъуьтIуьн пар,

Алатда ви рикIелайни туькьуьл къар,

Ваз акI жеда, ярдин гъил я хъуьтуьл гар,

Акьурла ви руьгь къакъатда, лагьана.

Марфад галаз цуьквер къвада цаварай,

Са шиирдал элкъведа ви гьар гьарай,

Дагъдин вацIуз мус хьайид я са кьарай,

Мад селлерихъ вун какатда, лагьана.