• Главная
• Биография
• Библиография
  • Книги об авторе
  • Литературная критика
• Творчество
  • Книги
  • Проза
  • Поэзия
  • Журналистика
  • Газета "Самур"
  • Ансамбль "Сувар"
  • Фото-творчество
  • Фильмы
• Блог
• Дневник
• Видео
• Фото
  • Семья
  • Интересные встречи
  • Мои фотографии
  • Ансамбль «Сувар»
  • Мои фото-репортажи
  • Юбилей-60-летие
    • 65-летний юбилей
• Аудио
  • Стихи в авторском исполнении
  • Авторские песни
  • Лезгинские народные песни
• Связь

Блог

Квахьзавай хуьр… Кьуьхуьр

     Ина рекьери элкъвез-элкъвез кьакьанрихъ ялзава. Дагъдин синерай, хкатай кьваларай, къацу яйлахрай тIуз физва рекьер. Иервилери рамзава рикI. Кьве дагъдин кьула шуршур ацалтна авахьзавай вацIу, чархарин яхадай кватзавай, лацу кифериз ухшар чарчарри хуьруьз рекье твазва чун. Цуькверин атирди кьил элкъуьрзава. СтIурив агакьиз тIимил амаз рехъ эрчIи патахъ элкъвезва. Гьанихъ кам къачуна, гуьнейрайни къузайрай тIуз, сал жигъиррай физ­ва чун.

     Эхирни агакьзава. Имни Кьуьхуьр... Эха рикI, эхиз жедатIа. Шехьмир вилер, сел хуьз жедатIа. ЧкIанвай кIвалерин, уьцIвенвай цларин, ацахнавай паруйрин акунри рикIин гъал атIузва. Сагьибсуз амай багълар, цан цазмачир генг чилер чан гузвай начагъ хьиз терг жезва.

     Кьуьхуьрар КцIарин дегь хуьрерикай сад я. Вичихъ гзаф агьалияр авайвиляй са хуьр бес тахьана, инсанри кьвед лагьай хуьруьн бине кутур, гьавиляй "Кьве хуьр-Кьуьхуьр" хьиз сейли хьайи лезги макан. Хайибуру негьна, хуьрерин жергедай акъуднавай диге. Етим аял хьиз садан рикIелни хквезмачир, гадарнавай хуьр.

     Са береда I00 йисалай гзаф уьмуьр гьалзавайбурун макан тир инаг. Адахъ шумудни са кьегьал рухваяр, иер рушар, авадан чилер, мублагь никIер, генг яйлахар авай. Хуьруьн суьруьйринни нехиррин и кьил-а кьил аквадачир.

     Кьилел даим лекьери сирнавдай Кьуьхуьр дагъдин синел ахъа хьанвай иер цуьк хьиз рикIиз чими тир. Зегьметдал рикI алай къени ин­санри уьмуьр гьалдай ина. Къадир хьанач райондиз регьбервал гайи ксариз абурун. Дагъдин хуьрерин агьалийриз къайгъударвал къалурун рикIелай алудна советрин кавхайри. Гилалди давам жезва и кваз такьун. Иниз рехъ акъудун са­дан рикIелни къвезвач.

     ЧкIизва хуьр. Алай вахтунда ина пуд хизан ама. Са юкъуз гьабурни ялгъузвиликай катда. Шегьерра кьакьан дараматар эцигзавайбуруз фялеяр герек я эхир.

  ... Са кIвалин вилик кицIи зарулдиз авзавай. Пуд йис я лугьуда, ада и кIвал хуьз. Сагьибар фадлай куьч хьанвай кIваливай къакъатзавачир кицI. Вафалу я эхир...

     Дагъдин кукIвал ялгъуздиз чан гуз гьазур хьанвай кьуьзуь лекьрез ухшар тир Кьуьхуьр. Балаяр яргъариз акъатна, дерт лугьудай касни амачир лекьрез.