Gündəlik
Бакуда диктант кьиле фена
2020-10-10
Алай йисан лезги диктант гзаф четин шартIара кьиле фена. Са патахъай вири дуьнья кьунвай коронавирусди, муькуь патахъай Къарабагъда кьиле физвай ягъ-ягъунри, анай къвезвай хабарри инсанар къарсурнавай. Гьа и крар тIимилди хьиз, Интернетдиз гьахьунни четинарнавай. Ингье залан гьалариз килиг тавуна, лезги чIал хуьн алай аямдин чIехи женгерикай сад тирди, гьакIни 10-октябрь лезги чIалан югъ тирди фикирда кьуна Бакуда «Самур» газетдин коллективди лезги диктант кьиле тухвана. Мярекетдиз лезги чIалал рикI алай чи ватанэгьлияр атанвай. Коронавирус себеб яз, мярекатдиз гзаф инсанар кIватIнач. Тедбир пандемиядин шартIарив кьадайвал тухвана. Диктант мукьуфдаказ, тешкиллувилелди кьиле фена.
