Йикъарган
Лезги чIалал сад лагьай фильм
2020-02-20
Дуьньядин лезгийри фадлай вилив хуьзвай “Къайи рагъ» фильм гьазур хьанва. Сифте яз кьве чIалал – лезги ва азербайжан чIаларал чIугунвай и кьве сятдин фильм арадиз гъун патал зегьмет чIугур инсанрин хвешивилин и кьил-а кьил авач. Лезги халкьдин ацукьун-къарагъуниз, адан руьгьдин кьетIенвилериз талукьарнавай и фильм алай йисан 16-мартдиз (азербайжан чIалал) ва 17-мартдиз (лезги чIалал) Бакудин Низами кино-театрда къалурда. Идалай гъейри фильмдин урус чIалал субтитрралди туькIуьрнавай лезги вариантни арадиз гъанва.
Сценарий кхьенвайди Седакъет Керимова, режиссер Элшен Зейналлы, оператор Элхан Рустамов тир, ролар Азербайжандин тIвар-ван авай актерри тамамарзавай фильмдин гзаф кадрияр КцIар райондин Яргун хуьре чIугунвайди я. Ролар лезгидалди рахурайбур Элвина Гьейдарова, Наил Шихкеримов, Менсуре Хийирова, Къурхмаз Хезеров, Роза Гьажимурадова, Жавид Тагьиров, Зекера Захаров, Севда Азизова, Мегьбубе Агъаева, Гуьлнара Къараханова, Анна Гьасанбекова, Элмара Гьажикеримова, Шамил Аликъулиев, Багъир Нурмамедов, Эдвиг Гьасанов, Улдуз Халилова, Севда Нуралиева, Муьзеффер Меликмамедов, Омар Нежефов я. Фильмдин продюсер Седакъет Керимова я. “Сувар” ансамблдин маничийрини макьамчийри фильмдик зурба пай кутунва. Элвина Гьейдаровади лугьузвай манидини Заур Мусаева кфилдал ягъизвай макьамди адаз кьетIенвал гъанва.
