Gündəlik
Лезги фольклордин няни
2017-12-23
2017 йисан 23-декабрдиз Бакудин Россиядин Информациядинни Медениятдин Меркезда «Лезги фольклор-дин няни» кьиле фена. Кхьираг Седакъет Керимовадин «Зи зари халкь» ктаб чапдай акъатуниз талукьарнавай мярекат кьиляй-кьилди чи фольклордин руьгьда туькIуьрнавай. Лезги интеллигенциядин векилри рикI алаз иштирак авур и нянидиз атанвай дишегьлийри вирида сад хьиз къуьнерик шалар, шарфар, яйлухар вегьенвай. И карди мярекатдин халкьдинвални метлеблувал генани артухарнавай.
Мугьманар патал туькIуьрнавай чIехи ёлкади мярекатдиз суварин гьава гъанвай. Цуькверин кIунчIар гваз атанвай мугьманрин кьула жегьилар гзаф хьуни рикIиз шад гьиссер кужумзавай.
«Самур» газетдин редакцияди ва «Сувар» ансамблдин коллективди санал арадиз гъанвай няни Россиядин Информациядинни Медениятдин Меркездин жавабдар къуллугъчи Елена Шишкаловади ачухарна. Ктабдин кьетIенвилерикай рахун патал гаф тIвар-ван авай къелемэгьли, «Самур» газетдин редактордин заместитель Муьзеффер Меликмамедоваз гана. Ам авторди ктаб арадиз гъун патал чIугур зегьметдикай, икьван гагьди акъатнавай лезги баядрин ктабрилай С.Керимовадин ктаб квелди тафаватлу ятIа рахана. Биологиядин илимрин кандидат Самира Бабалиевади, КцIар райондин Мучугъ хуьруьн юкьван мектебдин муаллим Незифе Къафлановади, жегьил химик Зекера Захарова, Бакудин тIвар-ван авай муаллим Реване Даньяловади ва масабуру цIийиз басма хьанвай ктабдикай, ам арадал гъун патал авторди чIугунвай зегьметдикай авур рахунар марагълубур хьана.
Идалай кьулухъ мярекат Седакъет Керимовади гъиле кьуна ва ада кIватI хьанвайбур чи халкьдин поэзиядин – баядрин алемдиз тухвана. И карда адаз залда ацукьнавай чи ватанэгьлийри мукьувай куьмек гана. РикI ахъайдай кар ам тир хьи, мярекатдиз кIватI хьанвай вирибурун лезги баядрал рикI алай. Сифте микрофондив эгечIай «Самур» Лезги Милли Меркездин кьил Имран Рзаева ва жегьил къелемэгьли, вичин махар мукьвал-мукьвал «Самур» газетдиз акъатзавай Азизрин Севдади межлисдал чан гъана. Абурун гуьгъуьна аваз Эльмара Гьажикеримовади, Эльшен Талибова, Жавид Алисманова, Ансият Мурсаловади, Альбина Сафаровади ва масабуру лезги баядар хуралай лагьана. Бакудин Серебровск посёлокдай атай Гуьлжагьан Малалиева вичин кьакьан, иер ванцелди «Перизадаяр» лугьуз эгечIайла виридаз рикIяй хвеши хьана.
Мад са кьетIенвал ам тир хьи, мярекатдиз КцIар, Къебеле, Хачмаз ва Огъуз районрайни мугьманар атанвай. Абурукай кцIарви муаллимар Шеркъие Челебовади ва Гьуьруьят Рустамовади баядар, Менсуре Хийировади хъуьтуьл ванцелди халкьдин «На зи дердер деринарна» мани лагьайла вири гьейран хьана.
Ахпа гаф межлисдин багьа мугьманриз – Дагъустандай кьилди и межлисдиз атанвай чи тIвар-ван авай шаир, композитор, «Лезги газетдин» мухбир Къагьриман Ибрагьимоваз ва адан уьмуьрдин юлдаш, шаир Гъулангерек Ибрагьимовадиз гана. Абурун рахунриз межлисда авайбуру гурлуз капар яна. Гъулангерека вичин шиир кIелайдалай кьулухъ Къагьримана чи лезги халкьдин рикI алай манийрикай тир «Загъадурзагъа» лугьуз эгечIна ва залда авайбуру вирида сад хьиз адахъ галаз ван-ванце туна.
Лезги фольклордин мярекатдив жегьилар мукьувай эгечIуни рикI генани шадарзавай. Абуру баядар лагьайла яшлубуруз лугьуз тежедай кьван хвеши жезвай. Иллаки «Сувар» ансамблдин кьуьлдайбур Гуьлнара ва Минара Къарахановайри, Мирвари Шиховади лагьай кьуд цIарари залда авайбуруз хуш легьзеяр бахшна.
«Сувар» ансамблдин концертмейстер, лезги халкьдин манияр кларнетдал, кфилдал, зуьрнедал чIехи шанкьунивди ягъизвай зурба сеняткар Заур Мусаева чи дегь макьамрал илигайла кIватI хьанвайбурун кIвачерик звер акатна. Ансамблдин виридалайни хъсан кьуьлдайди, вичин зурба алакьунралди сейли тир Бейлер Дадашова вич гьакIни хъсан далдимчи тирди субутна.
Виридалайни верцIи легьзеяр Роза Гьажимурадовадини Эльвина Гьейдаровади бахшна. Абуру халкьдин манийрал акьван устадвилелди илигна хьи, залда авайбуру датIана гурлу капар яна. Эмил Исмаилова гитарадал ягъиз, «Магьи дилбер чан» мани лагьайла садбурун вилерал накъвар акьалтна.
Нянидин иервални верцIивал «Сувар» ансамблдин коллективди артухарна. Ансамблдин цIийи регьбер Завир Нежефов кьиле аваз кьуьлдайбуру межлисдиз жегьилвилин, шадвилин гьава гъана.
Мярекат акьван рикIиз чимиди тир хьи, ам кьилиз акъатайдалай кьулухъ садазни хъфиз кIанзавачир. Чайдин суфрадихъ къени ихтилатрал илигай чи ватанэгьлийри вирида сад хьиз чеб ихьтин мярекатрик цIигел тирди мецел гъизвай.
