Gündəlik
РикIелай тефир мярекат
2020-07-09
2019-йисан 5-июлдиз Бакудин Рашид Бегьбудован тIварунихъ галай Манидин Театрда тIвар-ван авай шаир-журналист Муьзеффер Меликмамедован 70 йисан юбилейдиз талукьарнавай лезги музыкадинни поэзиядин няни кьиле фена.
Вичихъ агъзурралди кIелдайбур авай шаирдин мярекатдиз Бакудай, Сумгаитдай, Худатай, гьакIни Къуба, КцIар, Хачмаз, Исмаиллы, Къебеле районрай поэзиядал рикI алай цIудралди инсанар атанвай.
ТIвар-ван авай къелемэгьлийри, алимри, интеллигенциядин векилри, адетдин кIелдайбуру иштиракзавай мярекат гзаф марагълудаказ кьиле фена.
«Самур» газетдин кьилин редактор Седакъет Керимовади шаирдин уьмуьрдин рекьикайни яратмишунрикай авур рахунар, гьакIни «Самур» Лезги Милли Меркездин кьил Имран Рзаеван, отставкада авай генерал-лейтенант Яшар Айдемирован, академик Камил Айдазадедин, алимрикай Эдгьем Шагьмурадован, Шафи Данялован, Мамедагъа Сардарован рахунар ва маса ксари юбилярдиз лагьай рикIин гафар залда ацукьнавайбуру гурлудаказ капар ягъана, разивилелди кьабулна.
Вич 24 китабдин автор тир М.Меликмамедован са кьадар шиирар кIелдайбуруз хуралай чида. Мярекатдал Эдгьем Шагьмурадова, Айнур Наврузбеговади, Лейла Жавадовади, Асиф Салманова хуралай шаирдин шиирар кIелуни и кар мад гъилера субутна.
Мярекатдин рикIел аламукьдай макъамрикай сад анал манияр лугьун хьана. М.Меликмамедован чIалариз сад-садалай иер манийрин музыка Седакъет Керимовади теснифнавайди я. Гьам «Сувар» ансамблдин алакьунар авай маничияр тир Жавагьир Абдуловади, Элвина Гьейдаровади ва Роза Гьажимурадовади лагьай и манийри, гьамни ансамблдин куьлдай группади кьилиз акъудай «Дагъвияр» кьуьлуни вири гьейранарна.
Пуд сят кьван давам хьайи нянидин эхирда шаирди кIелдайбуруз вичин ктабар багъишна.
