Gündəlik
Санал кхьини муькъвер туькIуьрна
2020-07-09
2020- йисан 10-октябрдиз Бакуда кьиле фейи лезги чIалал диктант кхьинин мярекатдихъ вичин кьетIенвилер авай. Аниз яшлубур, жегьилар, аялар атанвай. Диктант кхьизвайбурухъ академик Камил Айдазаде, политолог алим Мамедагъа Сардаров, «Самур» Лезги Милли Меркездин кьил Имран Рзаев, «Гьерба» клиникадин директор Сефербег Сефербегов, хирург Явер Къачабегов, «Метак» компанидин гьасилатдин директор Мубариз Азизов, «Уьфуьг» тешкилатдин координатор Офелия Пирвердиева, кхьираг-режиссер Этибар СтIурви, журналист Летиф Шамхал, ингилис чIалан муаллим Севда Нуралиева, урус чIалан муаллим Чичег Агьмедова, кхьираг Азизрин Севда, «Сувар» ансамблдин кьил Завир Нежефов, маничияр Роза Гьажимурадова ва Эльвина Гьейдарова, «Алам» журналдин редактор Камран Къурбаналийрин, жегьил шаир Лейла Жавадова ва масабур хьунухьи мярекатдин дережа артухарзавай.
Диктантдив вири сад хьиз, рикIяй эгечIуни чахъ руьгь кутуна. Ам кьилиз акъатайдалай кьулухъни инсанар хъфизвачир. Абур ихьтин мярекатар тухунин важиблувиликай рахазвай.
Залдин са пата яшлу инсанар, муькуь пата жегьиларни аялар ацукьарнавай. РикI ахъайдай кар ам тир хьи, жегьилрин арада «Самур» газетдин дустар тир муаллимар, инженерар, духтурарни авай. Эльшен Талибов, Зекера Захаров, Айсел Алисултанова, Гуьлнара Къараханова хьтин чи вилик-кьилик квай жегьилар мярекатдик рикI алаз эгечIуни вирибурук руьгь кутазвай. Кьве гъвечIи гадади - «Сувар» ансамблдин солист Амир Гьасанова ва бицIи блогер Тогърул Беделова диктантдиз къалурзавай марагъ акурла хвеши жезвай чаз.
Азербайжанда диктант тухунин кардин тешкилатчи Седакъет Керимовади кIватI хьанвайбуруз чи алфавитдин тарихдикай, лезги чIалан кьетIен гьарфарикай малумат гайидалай кьулухъ ада диктант тухун патал Музеффер Меликмамедоваз гаф гана. М. Меликмамедова диктант вири гъавурда акьадайвал, гзаф хъсандиз тухвана.
60 касди иштирак авур мярекат кьилиз акъатай муькуь юкъуз интернетда гзаф шикилар эцигай чи иштиракчийрин къейдер кIелун марагълу тир. Абуру им рикIелай тефир мярекат тирди, гьелени чеб адан таъсирдик кумайди кьилди къейд авунвай. Гзаф инсанри чпиз геж хабар хьана лугьуз пашманвал чIугвазвай.
Диктантди чи халкьдин уьмуьрда къугъвай чIехи роль кьилди къейд авуна кIанда. Ада инсанрин рикIера дидед чIалаз кIанивал артухарна. И мярекатди чи ватанэгьлияр агудна. Адан виридалайни кар алай нетижа ам хьана хьи, дуьньядин лезгийрин арада муьгъ туькIуьрна.
