Bloq
Хъуьтуьл гаф лукьман я
Куьне фикир ганатIа, бязи лезги дидеяр чпин веледрив “я кьейиди”, “я кайиди” лугьуз рахада. Фагьум тавуна, адан манайриз фикир тагана лугьуда абуру ихьтин гафар. Са бязи жегьил дидейри лагьайтIа, чпин аялриз алхишар ийидач. Гьелбетта, им чи адетрихъ галазни алакъалу я. Диде-бубадин, ярандидедин, яранбубадин, яранстхадин патав аял къужахда кьуна адаз чан-рикI авун айиб я лугьудай кьуьзуьбуру. Гьавиляй алхишар авун бадейрин хивез вегьедай.
Садра зал вичин хтулдиз верцIидаказ алхишар ийизвай са баде дуьшуьш хьанай: “Я цаварин Рагъ!”, “Я вилерин экв!”, “Я гатфарин вирт!”, “Я дагъларин жив!”, “Я рикIин кьил!” Адан алхишар булахдин яд хьиз рикIи кужумдайбур тир. Ван атайбурун сивик хъвер акатзавай. Вичиз ихьтин чими гафар ван хьайи аялдин рикIе иер гьиссери цуьк акъуддачни? Аялдиз хизан, хуьр, ватан, дуьнья кIанардачни?
Захъ са мектебдин юлдаш авай. Абурун кIвале къай къекъведай. Бубадикай кичIела аялри витI акъуддачир. Дидедин мецик, на лугьуди, куьлег галай. РикI чуькьуьдай и кIвали. Инай акъатна хъфиз кIан жедай заз. Абурун аяларни гьа чеб хьтинбур тир. Гадаяр пел чIурубур, рушар тIимил рахадайбур.
Гьа инал лагьана кIанда: векъивилеринни къайивилерин бине кIвале эцигзавайди я. Къе са бязи хизанра, мукьва-кьилийрин арада авай серинвилерин себеб, бубайри лагьайвал, аял кьепIинамаз вердиш тавун, гъвечIизмаз адак инсанар кIан хьунин руьгь кутун тавун я. Куьнени икI фикирзавани?
