Bloq

     - Пиралрин хуьре “Супад булах” тIвар ганвай са чка ава. Гьейран жеди вун анаг акуртIа, - лагьана заз са таниш дишегьлиди.

“Булах гьинай, “супа” гьинай? Кьадай гафарни туш эхир”, - лугьуз веревирдерна за. - “Булахдин иервал ламран баладихъ галаз гекьигиз жеч гьа!”

     - Чи хуьре ихьтин тIварар алай са шумуд булах ава.

     Са шумуд йикъалай Пиралрин хуьруьз рекье гьатна зун. Тамун юкьва, лугьуз тежедай хьтин са иер чкадал чиликай хкатнавай, лап-лацу, цIалцIам къванер чуьхуьз-чуьхуьз, векьерин юкьвай секиндиз авахьна физвай булах акурла зи пагь атIана. ТIебиатдин и иервили “успагьи” гаф рикIел хкана зи. “Иер”, “гзаф иер”, “лугьуз тежедай кьван иер” хьтин манаяр гузвай и гафунин вичин иервилини ялна зун. Са береда лезги хуьрера “Успагьи” тIвар алай дишегьлийрални дуьшуьш жедай чун.

     Булахдал чин-гъил чуьхвена, адан мурк хьтин къайи цикай тухдалди хъвана, “ахвайш” лагьана за. Ахпа “ажеб успагьи булах я” гафар мецел атана зи. Эхь, эхь, “супа”, “ламра бала” ваъ, “успагьи”.

Ништа, са мус ятIани, сифте яз и булахдал дуьшуьш хьайи лезгидини адаз “Успагьи булах” лагьанай жеди. Иервили иер гафар рикIел хкида эхир.

     Гьа икI, КцIара шумудни са “Успагьи булах” хьанвайди я. Анжах йисар алатунивай маса тIварар хьиз и тIварарни дегишарна “успагьи”дикай “супа” авуна садбуру. “Успагьи”динни “супа”дин тафаватлувал кьатIуз тежер ксари чи гзаф булахрикайни “супад булахар” авуна.  Ихьтин кутугай тIвар алудна, вичел вижесуз тIвар илитIнавай булахдин гьал гьикI хьурай? Икьван иер булахрал бегьем тIварар эцигиз тежезвай чаз вуч лугьурай?

 

 

•